袁彌昌在AM730寫左篇文叫〈中間政治與香港前路〉。睇完，發現呢個真係對香港整個左翼運動既侮辱黎。
首先袁既政治研判極度有趣，佢話︰「近年來香港之所以風波不斷，歸根究柢是體制內的反民主和寡頭力量，剝奪了公民的民主權利，繼而剝奪了他們的經濟福利和個人尊嚴。」所以香港應該實行「社會民主主義」，呢個就係佢所謂既「中間政治」。
且慢，社會民主主義如何等於「中間派」，還是袁認為社會民主主義只不過政府政策做唔好，可以透過小修小補解決？而更惡毒一點係，佢將「帶抗爭面向」既社會民主主義矮化成一種「中間派獻比政府既治術」。政府、資產階級自然知道發生咩事唔出聲，但真係唔少人繼續比佢呢套思維扯住走。
袁對香港既階級分析完全錯晒（重要係故意），到底如何可以提社會進步而唔抗爭？香港功能組別向工商界別傾斜、香港資本同中共勾結共謀，甚至獅子山精神更多既係新自由主義既文化政治學工程。有咩可能透過一句「務實、革新思維」處理到晒？
用人話講︰「你唔係以為唔駛鬥地主就可以有社會公義啊袁生！」
我唔直接答你，用例子答你。桑德斯要解決美國長期貧富懸殊，華爾街富人壟斷，佢都真係要係要同有錢人宣戰，政綱到寫明要將大銀行拆散、大幅度向富人收稅。至於香港，咁多年黎社會主義路線由民協（未崩壞前）、街工（未崩壞前）、社民連都有提及，結果有邊次唔係要鬥爭。碼頭工人如是、海麗如是。又，係立法會，侍產假、最低工資，有邊次唔係同班張宇人、西門梓地產黨鬥到癲。真係好想知「中間路線」如何咁容易令班人放棄佢地既階級利益？
又，點解咁憎袁彌昌，係佢故意延續「民生VS民主」既框架，繼續寫「香港駛咩革命啊，搞第三條道路咪得」、繼續軟性維穩，扮下建制壞孩子、然後上立場扮咩「唐吉軻德」。
又又，唔知有幾多人落搭（好似真係有人睇完立場人語，話連結袁彌昌好過連結班左膠泛民）。一個會幫曾俊華助選既人、曾經係葉劉度工作既人、曾經咁右既人突然寫下D「中間路線式社會民主」，然後就話佢係好人。明顯係軟性毒藥。
最後最後一次又，講真，有D社會民主、經濟民主思考好事黎，近期有關既時事評論多咗（可能武漢肺炎殺到埋身，發現原來真係要失業救濟金）。但真係唔想再落入個D 「你要民主定民生」、「走中間理性路線務實惠民咪好好」既假幻想。
事實就係，不論麵包定玫瑰，爭取既方法只有鬥爭、鬥爭、同更激烈既鬥爭。
——繆拉
#夜貓 #袁彌昌 #社會民主主義