前一回鏈結在此。
「因為，我喺條片入面，見到我自己。我係每朝都搭三號 lift 返工嘅。」「證人，你講多次？你話你響條片入面？」「冇錯。喺條片入面，我睇到我自己，而且片中嘅情況，亦同我返工搭 lift 所見到嘅相同。」「證人，我想你搞清楚，你到底而家係以一個捶制室主管嘅身份，確認幾條所謂 CCTV 片段嘅真確性，還是聲稱自己係所謂 CCTV 片段入面出現嘅人呢？」裁判官介入示意證人先離開法庭︰「證人，麻煩你暫時離開法庭抖下，我地想處理一啲法律爭議。」
裁判官然後轉向主控官︰「主控，似乎係你要搞返清楚個問題喎。我當然唔會教你盤問，但係你如果要質疑證人作為 CCTV handler 嘅可信性，就用一條獨立問題去問；如果你要提事實爭議，質疑證人所指見到自己出現喺 CCTV，咁你就開門見山由呢個方向盤問佢。有冇困難？」「Sir，我同意你嘅指示，我會 rephrase 過晒啲問題。」「咁你嚟緊對住 DW2，係會 challenge 片段 authenticity 定係佢認出受害人嘅事實證供？」「裁判官閣下，我保留 dispute on both matters 嘅權利。」「好，麻煩叫返證人入嚟。」
主控官繼續盤問控制室主管。「證人，我想向你指出，由於你直到今日之前，其實冇睇過 4 條 CCTV 片嘅內容，所以假如 —— 裁判官閣下，我強調係假如 —— 片段交左畀辯方之後，曾經有竄改或者做手腳，你係冇辦法知道嘅。我要強調，我唔係問你而家睇左條片有冇見到竄改，我係問你，你係冇辦法控制、布辦法知道，條片交左畀辯方手之後，發生過咩事，你同唔同意？」「我同意。」
「好。而就住片段嘅質素，我想向證人你指出，你係並冇可能單憑二十秒嘅片段，或者好似我剛才講，百分之零點五五嘅部分，而認出你自己嘅，係嗎？」「我唔同意，我的確由頭先片段當中見到自己。」「即係你而家想同法庭講，雖然條片係半年前嘅某個特定嘅一剎那，而你居然可以半年後突然間作證話記得自己係搭緊呢部 lift，我想問你，你同唔同意，呢個講法完全唔可信？」「唔同意，我肯定片入面見到嘅係我。」「裁判官閣下，控方已經問完。」
「而家大約仲有五分鐘到十二點半。辯方有冇覆問？」「裁判官閣下，辯方只有少數幾樣嘢覆問，我地可以喺 lunch break 之前完成呢個證人。」
「證人，就住剛才控方質疑你自稱出現喺片段、搭緊三號 lift，我想請問，點解你會認到自己？」「我認到自己嘅衣著，仲有片段入面影到個『3』字，而且，片段入面嘅情況，同我每日上晝搭 lift 返工見到嘅情況相符。」「係啲咩情況？」「我周不時返工搭 lift，都會見到有個軍裝差人，拎住份早餐搭 lift，日日都見，即係好似條片入面都有個警察。」「你係日日都見到？」「日日都見到。或者應該咁講，我唔知佢地掉更定咩嘢，總之一見，就會 keep 住幾個禮拜都日日見，然後就有一排唔見，但之後又見返咁。」「咁樣維持左幾耐？」「我諗由第一次見到個警察拎住份早餐開始計，都有大半年啦 …… 係呀，中間有陣冇見佢嘅，即係呢單嘢出事嗰排，最近又見佢返嚟醫院當更咯。」「咁有冇朝朝早搭lift 又見到佢？」「都有架，又係一排見一排唔見咁。」「你本身識唔識個警察？」「唔識。」
「裁判官閣下，辯方已經問完。」「下晝兩點半繼續。」
護士表示想自己一個人吃飯，冷靜一下，預備下午的作供。
Day 4 下午，由 Ms. Lau 開始主問護士，很快進入到事發當日的部分︰「你剛才講到，覺得畀個警察阻住你落 order，所以『頂』左一聲，咁個警察有冇回應你？或者其他動作？」「冇。」……
「你離開飯堂，之後發生咩事？」「我好似平時咁，沿住走廊行去樓梯方向，去到走廊尾準備開防煙門，突然間，我聽到後面有啲腳步聲，越嚟越近、越嚟越清楚，我喺防煙門塊玻璃望下，係個警察。咁我初時以為佢可能係上樓梯，就冇為意繼續行入後樓梯。」「即係事發條樓梯？」「係呀。」
「然後呢？」「然後，我聽到佢依然繼續喺我後面落樓梯，仲一路行一路整啲『的的噠噠』聲，我突然間直覺係，好驚，唔知佢想點，又唔知有咩事。我唔敢向後望，之後行快啲，佢又跟住行快，我突然間把心一橫，揭起杯咖啡個蓋，就轉身淋去佢度，之後就跑返去二樓喇。」「裁判官閣下，辯方完成主問。」
主控急不及待，登時起立。「裁判官閣下，控方想向被告播放控方證物 P2，走廊閉路電視片段 …… 趙先生，你剛才話事發時候你一路行，有啲越來越近嘅腳步聲，又講到有啲聲音『的的噠噠』好似令你好驚咁 ……」「唔係好似，係真係好驚 ……」「被告，你唔好打斷律師說話。」「對唔住，法官大人。」
「裁判官閣下，唔該晒。請證人你一路睇住片段，指出你喺片段邊個部分開始，聽到你所謂嘅越來越近嘅腳步聲？」「我 …… 我，睇唔到。」「即係片段並冇出現你所講，後面有個人越行越近嘅情況嘅，係咪？」「個警察係突然間跟實我，嗰度已經貼近防煙門，呢個閉路電視影唔到。」「哦，閉路電視影唔到 …… 定係你明知嗰個係閉路電視死位，所以你編個故仔出嚟話個警察貼實你？」「我講真架，我冇講大話，個警察係出左鏡先開始跟貼我。」
「我都要向你指出，所謂咩警察搞到你好驚，即係你頭先提到，好急步咁跟住你落樓梯，整咩「的的噠噠」聲，都係你編造出嚟，係咪？」「我冇，我冇，個警察真係吊住我，我唔知佢想點，一時驚先至淋佢架。」
主控官亦要求護士確認，兩人在事發前完全沒有發生過爭執、口角，警察亦沒有對他作出過任何行動，例如搜身或者拘捕；護士除了堅持警察曾經緊貼跟隨、還有弄出那些「的的噠噠」的聲音外，大致沒有反駁。控方完成盤問後，Ms. Lau 沒有再覆問，護士就此完成他的作供。
老闆成功說服裁判官，趕及在 Day 4 完結前傳召最後一個證人，亦即是三樓飯堂的老闆。Ms. Lau 的主問相當簡短，她讓老闆說明見到事發前雙方各自買早餐的經過，並且確定雙方沒有激烈地爭拗過。老闆說，他當天要兼顧水吧，收銀處在遠處，他沒有為意警察曾在那邊停留了多久，也聽不到有人說過「頂」字。沒多久，他聽到走廊另一邊傳來一些叫聲，他沒有走開，後來就有很多警察去了後樓梯那邊調查呀封鎖呀這樣。
主控盤問時問到，他為何對半年前的那的事如此印象深刻。「因為嗰日個軍裝嚟到買早餐，佢等等下突然間走左出去，份三文治都未整好，跟住佢冇返嚟，我就跟手食埋嗰份早餐。因為呢件事，所以我幾深印象。」