一個西九高鐵站清潔工人的自述 | 阿賈

我叫阿賈,係一個外判清潔工。2018年某一日,老細同我講:「阿賈,下星期一起去西九高鐵站返工。」喂,我住喺荃灣,原本行路就返到工。突然叫我去西九返工,唔通想博我頂唔順啲車費自己辭職?我唔會咁易屈服嘅。

第一日返西九,就諗起差唔多十年前嘅乜鬼反高鐵運動。啲細路無啦啦反對發展,仲要堵路搞亂香港,幾咁不該!雖然我唔係做地盤啫,但我都識乜野叫做「工人大團結」!你咁樣反法,啲地盤工人冇得撈、冇飯開,係咪你負責先?啲人話乜野一地兩檢好有問題,乜野基本法我真係唔識。但係咁貴起條鐵路,冇一地兩檢就嘥氣啦。我呢啲咁社會底層嘅人,平日都冇乜娛樂,有時去下啲短線廣東省兩日團已好開心。如果呢條高鐵能夠幫我平啲去遠少少,都唔知幾有用!啲細路真係無知!自己唔搞事,就唔怕香港有些少地方俾大陸管,行大陸法律啦。

返西九第一日,先知原來要幫手清潔內地口岸區喎。哈!當時我即刻覺得好掂!原來老細唔係想炒我,直頭係益我!唔好問我怕唔怕返緊工有冇得上Facebook,我做緊野根本連部手機都掂唔到。

如是者喺內地口岸區做左半個月,都冇乜問題。大陸啲關員對我都幾好,好有禮貌。唯一問題就係好似清潔人手唔多夠,我成日一日要做起碼十個鐘。月尾出糧,我揭開糧單一題,喂唔啱數喎!我追問老細:OT補水計唔足喎!點知佢話,你36蚊一個鐘嘛,邊有計錯?我咪答佢:我喺內地口岸區做喎。用大陸法律架嘛,人地大陸法例講明,加班費起碼要係人工嘅150%喎。點知老細話:「你咪傻!政府話架,內地口岸區入面營運商嘅僱傭權益,係跟香港法例喎!」

我聽到之後,真係晴天霹靂!原本以為以後因為喺內地口岸區可以賺多啲加班費,點知咁多樣野都用大陸法例,竟然工時、補水就用香港呢啲仲差過大陸嘅規矩!鬼叫自己睇新聞唔睇清楚啲,空歡喜一場!

喺內地口岸區做多半年,老細又話,份外判合約到期啦,你地簽左呢份自願離職書啦。呢啲招數我阿賈見慣啦。我喺呢間公司做左差唔多三年,簽左呢份野咪冇左遣散費?梗係唔簽。老細嚇我地話,唔簽就算,斗零遣散費都唔會俾!我聽到真係好嬲好嬲好嬲!我拎住啲「架撐」準備開工時,一時激動就大叫:「各位手足,唔好做啦!我地唔罷工佢地唔會賠返啲遣散費俾我地!」

其他工友都未應我,就有一個大陸遊客問我:「你這樣公開的搞罷工,不怕嗎?在內地,不是顛覆國家政權也是尋釁滋事了!」好在我熟讀基本法:「唔怕!基本法廿七條話,我地有集會自由、罷工自由!」一講完呢句,我就俾人捉左唔知去邊,我掙扎時聽到有人話:「基本法喺呢度唔適用喎!」