再次上庭前一天，護士準時來到寫字樓，並且帶同了家人、同事和上司的求情信，還有接受私家醫生檢查後取得的精神科報告。
（上回鏈結，請按此）
「趙生你好，今日 Ms. Lau 會同我地一齊開會，主要係睇返警方提供嘅 CCTV 片段，同你對返相關嘅人物事件，同埋由你確認條片有冇做過手腳之類。」「趙生，同埋我地要同你解釋返，飯堂同後樓梯都係冇裝閉路電視鏡頭，控方提供嘅，係你離開病房、經過走廊去飯堂、由飯堂沿返走廊行去後樓梯，仲有你返返入病房嘅片段。冇問題嘅話，我地開始喇。」
我就放入光碟，播第一條片。「拿趙生，呢個係你離開二樓病房嘅一刻，我地已經 mark 左時間，係 08:30:34。基本上有關嘅只係一剎那，你有冇問題？」「冇問題。」「個片係真確嘅？」「應該係。」
「拿我助手而家播緊第二條片。你留意下，個時間係 08:28:00 開始，我地可以睇埋個軍裝入飯堂嘅情況。阿基，你 fast forward 少少 …… 拿呢度，08:31:43，見唔見到個軍裝向緊飯堂方向？」「見到。」「拿慢慢，而家正常 play，08:32:56，呢個入鏡嘅護士，你認唔認到係邊個？」「應該係我。」「好，我地見到，一路行行行，未有任何衝突位嘅。」
「留意下，而家係最緊要嘅第三條片。飯堂到後樓梯。呢度開始，08:38:00 …… 好，嚟到 08:38:17，定一定格。見唔見到個男護士？」「見到，係我嚟。」「手有隻紙杯呢個？」「係。」「好繼續。拿好快，已經有個軍裝，你後面，08:38:18。而家兩個一前一後，行緊埋鏡，行，行，行，行。好，過左鏡。趙生，我唔播埋其他先，因為呢一段有樣嘢幾關鍵，我助手要同你搞清楚。阿基。」
「趙生，你上次開會話個軍裝出左飯堂就一路吊住你，係咁講粗口鬧你，你就冇理佢，直到過左防煙門入左後樓梯，佢就話要打你，你就淋佢，係嗎？」「係咁上下啦，頭先條片冇聲喳嘛，佢係不停鬧我架，你問醫院畀埋有聲嘅片先啦。」
「趙生，個重點係，我地睇返條片 …… 我想同你搞返清，你指佢不停鬧你，係由出左飯堂已經開始鬧，定係臨入到防煙門先至鬧？」「係一路行一路不停鬧架。」
「但係，條片影到大半條走廊，你兩個入鏡開始計，個軍裝其實一路 keep 住你後面起碼兩、三個身位，你要同法庭講佢邊行邊鬧你，其實就比較難 convince 法官嘅。」
「我助手講完等我加幾句︰或者咁講，呢個距離同環境，如果佢好似我地以往見嘅情況，係鬧你、挑釁你，導致到後來你用滾茶淋佢，第一，呢個頂多只可以當求情，唔可以打甩條罪，因為法律上佢嘅情況唔似構成對你有武力威脅，導致你要用武力自衛；第二，如果你個講法成立，咁個軍裝基本上要幾大聲講嘢、甚至大嗌大叫，先可以符合你個講法。你搵唔搵到走廊附近其他醫生、護士或者病人做證人，證明個軍裝當時大聲鬧你？」「咁 …… 又應該冇證人嘅。」
「如果你堅持，就可能要傳你上證人台提供呢個講法。因為你在警署從來冇講過軍裝追住你鬧呢件事，所以法庭係第一次由你把口知道呢樣嘢，法庭信唔信，亦完全只取決於你夠唔夠說服力。」
「另外，你而家未駛決定係咪要作供住。你可以去到審訊中段，控方結案之後，先再決定要唔要上庭自辯，我只係想提一提你，如果你決定要講 PW1 點鬧你挑釁你，一係你畀證人我，一係你自己上證人台講。而就我目前所知謊嘅情況睇嚟，你呢個講法好弱。」
「咁，係咪我畀唔到咩證據證明個警察有恐嚇我，我就要判好重架喇？」
「我再解釋畀你聽。你用滾茶淥傷個警察，而家條罪係『對他人身體加以嚴重傷害』，其實條罪本身仲重過一般襲警，就等同話你拎件武器襲擊一個人，打到爆缸、斷骨咁嘅程度。被人控告襲擊呀、傷人之類，你可以抗辯話你冇做過；另外，如果你承認有做過，你可以提出一個抗辯，就係成日講嘅 self-defence。自衛，即係對方打你，你保護自己，而用武力對抗，過程中整傷佢，如果法庭接受，唔係淨止判輕，係完全可以無罪，釋放。」
「但係法庭點先接受你話自衛呢？首先，你要證明對方真係有個武力威脅到你，你係真誠相信自己會有危險，呢個係第一關；之後，就要證明自己用嘅武力程度恰當，而呢個有客觀標準，唔係一句話『我覺得適當』就得。即係人地用支牙籤篤你，你用支點三八打爆佢個頭，咁當然唔可以啦。至於你個情況，第日上庭就係要解釋到，個警察做左啲咩、講左啲咩，係會令平常普通人都覺得，你用杯滾茶淋佢、阻止佢，其實係合理嘅。有呢樣野證明到，你贏面就好大。如果唔係，如果定罪機會高，你擔心重判，就可能要認罪求情。」
護士聽著聽著，眉頭就一路越鎖越緊。「拿你唔駛緊張，我再簡單講多次你今晚要決定乜嘢。如果你有把握，可以說服到法庭你淋個警察係出於自衛，聽日上庭，就話唔認罪，法庭會排期，開審。如果你決定認罪，聽日認，判刑可以減三分一，如果再拖到去開審喎日先認，就可能減得四分一甚至得五分一；呢條罪幾重，你未必會坐足最高三年，但係罪成幾肯定一定要坐，而且應該斷月計，唔係斷日或者星期計；你今日畀我嘅求情信同精神科報告，我聽日會全部帶去，如果認罪，我會遞畀法官求情用。再總結一次︰有把握證明到自衛嘅，聽朝同我講，唔認，排期打；想認罪嘅，聽日就好大機會即刻還押，中間我會求情；十五十六嘅，就最好都唔好認住，但如果到第日再認罪，扣減會少好多。你返去諗諗先，記得聽日早二十分鐘去到一庭門口。」「咁我返去先，聽日畀決定你，唔該晒劉律師。」「阿基，送完趙生入我房。」
「阿基，而家就算退一萬步，拗得到個軍裝有鬧過佢，頂多夠求情唔夠打甩。聽日佢如果指示認，我會搏一搏問控方 amend brief facts 加返一段話警察鬧佢，不過控方一定唔肯，我就唔傾向開 Newton，除非 client 畀到證人我。Psychi 點講？」
「情緒算穩定，唔見有暴力傾向。醫生話相信被告事發前後有抑鬱徵狀，可能同家庭壓力有關，但唔見有幻聽幻覺情況。警署 VRI 入面見到有猶豫、表情不安，幾條問題反應比較慢，但大致對答清楚，思路唔見有問題。」「即係最多拗到警署會面有可疑、壓力大，但冇得 plead mental，但起碼佢冇扮癲。求情信呢？」「老闆，屋企人、同事、舊同學、大學老師，加埋十八封，有一封係衛生界議員，都係話佢平時樂於助人呀品性平和呀今次係一時衝動之類。」「怕且都係勸佢認罪好啲。阿基，你今日早少少收工去醫院，對下控方畀份平面圖有冇錯。」
在醫院，我先後核對了急症室警崗、二樓病房、三樓飯堂，以至走廊和所有閉路電視的位置，然後回家。正當我正和兒子玩得不亦樂乎時，手機響了。
「阿基，你去左睇現場未？」「去左喇，控方幅圖冇錯。」「個警崗喺唔喺出事樓梯嗰個 wing？」「你等等 …… 唔喺。幅圖同現場一樣，警崗近東翼入口，條樓梯在西翼。反而警崗隔離有部 lift。」
老闆既然有吩咐，我不敢怠慢，第二天聆訊前三十分鐘已經開了一庭旁聽的玻璃房。沒多久，劉律師也到了，然後是護士。
「趙生，未開庭前，我想問多幾樣嘢，之後會畀意見你。你係咪每日都同一時間去買早餐？」「總之返親早更就係八點半去買早餐，我地每兩個月轉更，所以呢兩個月都係八點半去飯堂。」「得，我寫低。你響呢間醫院做左幾耐？」「到下個月底就五年半左右。」「即係呢五年半以嚟，只要你輪到返早更，都會八半買早餐，朝朝如是？」「係呀，朝朝。水吧阿姐都認得我喇。」
「你話你返工唔會經過東翼急症室，所以你唔識 PW1？」「係呀，都唔順路。我又唔駛收急症，真係從未同佢講過嘢喎。」「但你做左五年半，有冇『見過』佢？」「律師呀，我朝朝買早餐都會見啲軍裝出出入入，但有啲買完就走，有啲耷低頭食，我都認唔到佢地啦。」「即係你未見過呢個軍裝去飯堂食早餐？」「咁我又唔敢肯定佢係咪有去過，我可能有見過佢幾次，但係冇講過嘢冇嘈過呀，係今次先出事喳嘛。」
「最後兩件事︰第一，你有冇見過佢食完早餐落樓梯？」「咁肯定冇，除左嗰次，我從未見過有軍裝會行樓梯嘅，我從來冇見過佢行樓梯。」「好，我寫低。第二，你仲係咪堅持話佢離開間飯堂邊行邊鬧你？」「拿律師，講老實，我有作大左，所以我冇證人證明佢鬧我，因為實情佢冇鬧到我，不過佢一路跟住我行，我又真係怯，去到後樓梯，我就唔知點解突然覺得好驚 ……」
「Ms. Lau，控方到左庭喇喎。」「阿基，你去簽到先，我 advise 埋 plea 就入嚟。」「咁我要唔要同主控提，話你可能想改 brief facts？」「唔駛。」
法庭檢控主任率先發言。「裁判官閣下，控方向辯方確認，可以答辯。趙靈光，你被控於 2015 年 8 月 7 日，在衛生醫院主樓西翼梯間，對中國籍男子姚振平身體加以嚴重傷害，請問你認唔認罪？」
（待續……）