作者按：經過多年來以文字分享工作見聞，輔以少許法律程序常識的淺介短評後，基層工人想來一次大膽新嘗試，將日常法律前線工作所見過的新奇人和事，改頭換面，重新包裝，半真半假地寫成狗屁不通的小說文字，呈現讀者眼前。淺陋文字的背後，還是不忘初衷，期望避開艱澀的概念與火星文，幫助讀者對司法體制了解更多，尤其想沖淡一下不知所謂大台律政劇的荼毒。
跪求讀者大大力的指正、批評，好讓基層工人認識到自己何等不自量力，盡快收起鍵盤，從作家的春秋大夢中醒來。
我接過不少襲警案，新來到的這一宗，看來亦無甚可辯。
男護士，32 歲，被控在醫院梯間用滾燙的液體潑向一名軍裝警員，造成警員臉部、胸部和手臂燙傷。案情摘要寫著，護士於事發同日就在工作的病房被捕，警誡下曾經講過「個警察想打我，我先淋佢架喳」；除此之外，護士沒有回答任何問題，亦拒絕簽署補錄口供。
護士正是在事發醫院工作，而受傷的警員亦在同一醫院急症室當值。據警員在口供紙所說，他不認識護士、兩人工作上沒接觸、從來沒過節。事發前他離開急症室警崗，上三樓飯堂買外賣早餐，買完就取道樓梯返回警崗；走在前面的男護士突然回頭，將手上的熱茶淋向自己，他下意識用手擋，但感覺臉、胸口和手灼痛難當，整個人跌坐在一旁。護士然後匆匆向下走。
CID 探員供述指，上司接報說有警員在醫院遇襲，施襲者身穿男護士制服。他與同僚先到醫院為警員落口供，然後翻看醫院內的閉路電視錄像，找出早上跟警察一同離開飯堂走到樓梯的人的身份；再向護士長查問，很快就知悉嫌疑者的身份，並知道他在二樓病房工作。於是整隊探員就帶同已經脫下軍裝的警員到二樓，由警員認出潑他的護士，隨即警誡拘捕。
除了警察，二樓病房的護士長也錄取了口供︰被捕護士當天上早班，當值至大約八時半休息時間就去買早餐；他一向習慣買一杯咖啡回二樓，天天如是，事發當天亦一直未見他有何異樣，直到他從三樓回來時，只見他手上沒有咖啡，氣沖沖地罵了一句「頂，杯咖啡行樓梯倒瀉左」；護士長問他要不要再買，反正休息時間未完，他說不用，又再繼續工作。護士長指他整個上午仍沒有甚麼特別，只是顯得有些心事、沒精打采，她以為是因為他未喝咖啡提神，還有她大約知道他的太太最近生病，所以狀態不佳。到中午過後，還未到早更下班時段，有兩個便衣男士由主管醫生帶著進入了病房，然後就把護士帶走了。
提堂當日，負責案件的 partner 劉律師以控方未提交所有文件（包括醫院的閉路電視片段）為理由，申請押後答辯，裁判官批准將案件押後三星期，暫時毋須答辯；由於院方已經將護士調往另一座大樓做後勤工作，辯方亦申請收窄保釋條件，即是只限制他不得進入涉事的大樓和接觸控方證人（包括警察及病房同事）。控方亦不反對。
從法庭回到寫字樓，我終於有機會與護士詳談。
「你識得個警察？」「唔識。」
「你同佢之前有冇衝突呀鬧過交呀牙齒印之類？」「冇啦，我平日返工都唔會經過急症室，見都未見過佢。」
「咁人地為咩事要打你？」「我點知啫，而家我請你地律師樓幫我喎，乜唔係你話我聽應該點拆架咩？乜你審返我轉頭。」
「趙生，頭先我都講過，我地問你攞指示，實際上就係要知實情係點，然後先幫到你。其實原理同你地做護士一樣，病人每日咩情況，有冇進展，你地一樣好靠病人同你地講實情，係咪？」我們再爭論了一會︰「仲有，我唔係律師，但我都跟老闆做刑事上庭好多年，好老實，我嚟緊要問嘅嘢，連我呢個 level 都知道，檢控官庭上係一定會問，我地都要知你個講法合唔合情理，先知道點幫你。」
「或者我再問過︰你有驗過傷，但嗰個係因為你投訴響警署畀 CID 打、畀佢地摑，所以去驗；但係你喺病房畀人拉嗰陣，已經講過『個警察想打我，我先淋佢架喳』，呢句唔止 arresting officer 聽到，連護士長口供都有，所以我想搞清楚︰你係咪指你身上有啲傷，係個軍裝喺後樓梯打傷你造成？」「冇呀，我畀人拉時候係話個警察『想打我』，軍裝冇打，我係阻止佢所以淋佢；後來響警署先至畀便衣打。」
「即係我寫低你指示先︰PW1 冇真係打你，身上嘅傷係其他警察打嘅。」「係呀。」
「咁點解你覺得個軍裝『想』打你？幾時有做過啲咩兇你？嚇你？」
「咁嘅，我要講遠啲︰嗰日朝早，我照常去買早餐，個軍裝排我前面。佢畀左錢拎左張飛仔，咁到我啦，我開口講『我要杯熱 ……』我個『齋』字都未講，個警察又行返轉頭，問個收銀員有冇收多佢幾蚊之類。咁我咪唔高興「頂」左一聲，但係好細聲，而且我擰咩面，冇出聲鬧佢，連「睥」佢都冇，總之佢再搞一輪，卒之收返錢走左，咁我咪繼續嗌嘢飲囉。」護士喝了一口水。「好喇，我埋水吧拎埋杯咖啡，行去落樓梯啦，點知個軍裝居然吊住我，係咁講粗口鬧我喎，我冇理佢啦，去到樓梯，佢重話要打我喎，咁我要自衛嘛，咪一杯咖啡潑埋去，然後咪走囉。返到病房，我咪作埋個大話，話自己杯嘢倒瀉左囉。」
送走了護士，劉律師閱讀了我邊開會邊寫下的 attendance notes。「咁啲 CCTV 片段就好關鍵。Police 嗰邊一畀碟我地，我地即刻一齊睇。仲有，你幫我約 client 下次上堂前一日上嚟，我地播住條片問佢 take instructions。」
（待續……）